ბოლო დღეების განმავლობაში თალიბანის ექსპანსია უფრო მასშტაბური ხასიათი მიიღო - ქვეყნის სასოფლო პერიფერიებში უპირატესობის მოპოვების შემდეგ თალიბანის ახალი სამიზნე ურბანული ცენტრები და დიდი ქალაქებია.
გასულ შაბათ-კვირას თალიბანმა ჩრდილოეთ ავღანეთში სამი პროვინციული დედაქალქი აიღო, მათ შორის უდიდესი ქალაქი ყუნდუზია, რომელიც 350 000-იანი მოსახლეობით ქვეყნის სიდიდით მეექვსე ქალაქია. ყუნუდუზი ამავე დასახელების პროვინციის დედაქალაქი და სამხედრო-სტრატეგიული თვალსაზრისით უმნიშვნელოვანესი ქალაქია.
ამავდროულად, ქალაქი ატარებს სიმბოლურ მნიშვნელობასაც, სწორედ ამ ქალაქში აღიარა მარცხი თალიბანმა 2001 წლის შემოდგომაზე აშშ-ის სამხედრო ინტერვენციის ფონზე.
ყუნდუზის გარდა თალიბების კონტროლს დაექვემდებარა ქალაქი ტალიკანი და სარი-პული. გასულ კვირას თალიბებმა კონტროლი დაამყარეს ეთნიკური უზბეკებით დასახლებული ჯავზიანის პროვინციის დედაქალაქი შიბარღანი. აქ თალიბანს ავღანელი უზბეკების გამოცდილი ლიდერის რაშიდ დოსტუმის ძალები ებრძვიან.
თალიბანმა დაიკავა ნიმრუზის პროვინციის დედაქალაქი ზარანჯი. ავღანეთის თავდაცვის მინისტრით ინფორმაციით, მძიმე ბრძოლები მიმდინარეობს ჰერათის პროვინციის სხვადასხვა ქალაქების მისადგომებთან. ქვეყანაში შექმნილი ვითარების ფონზე საკუთარ მოქალაქეებს ავღანეთიდან წასვლის შესახებ მოუწოდა აშშ-ის სახელმწიფო დეპარტამენტმა და დიდი ბრიტანეთის საგარეო საქმეთა სამინისტრომ.
აშშ-ის სამხედრო მისიის დასრულების მოახლოების ფონზე ქვეყანაში თალიბანის ტერიტორიული ექსპანსია დაიწყო. სხვადასხვა მონაცემებით ამ დროისთვის თალიბები ავღანეთის ტერიტორიის 80%-მდე აკონტროლებენ.
ამ დრომდე თალიბანის კონტროლს მიღმა რჩება ქვეყნის უდიდესი ქალაქები ყანდაარი და დედაქალაქი ქაბული, თუმცა მოსალოდნელია, რომ ამ ქალაქებისთვის ბრძოლები მალე დაიწყება.
უფრო მეტი ავღანეთში მიმდინარე კონფლიქტზე წაიკითხეთ აქ.